Crime News: పెళ్లి వేడుకలో విషాదం.. 13 మంది మహిళల దుర్మరణం

లఖ్‌నవూ: పెళ్లి వేడుకలో విషాదం చోటుచేసుకుంది. ఓ వివాహ వేడుకకు వెళ్లిన 13 మంది మహిళలు ప్రమాదవశాత్తు బావిలో పడి మృతిచెందారు. మరో కొందరికి గాయాలయ్యాయి. ఈ ఘటన ఉత్తర్‌ప్రదేశ్‌లోని కుషీనగర్‌ జిల్లా నెబువా నౌరంజియా వద్ద చోటుచేసుకుంది. పెళ్లికి వెళ్లిన బంధువులు సమీపంలోని ఓ బావి స్లాబ్‌పై కూర్చున్న సమయంలో అది ఒక్కసారిగా కూలిందని.. దీంతో 11 మంది అక్కడికక్కడే చనిపోయారని అక్కడి అధికారులు తెలిపారు. మరో ఇద్దరు ఆస్పత్రిలో చికిత్స పొందుతూ మృతిచెందారన్నారు. బావిలో పడిన మరికొందరిని స్థానికులు రక్షించినట్లు చెప్పారు. ఈ ఘటనపై సీఎం యోగి ఆదిత్యనాథ్‌ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు రూ.4లక్షల పరిహారం ప్రకటించారు.