అతివేగం.. యువకుడికి ప్రాణసంకటం..

చింతల్‌: రోడ్డు దాటుతున్న ఓ యువకుడిని ద్విచక్రవాహనదారుడు అతివేగంగా ఢీకొట్టడంతో అతడు కొంతదూరంలో ఎగిరిపడ్డాడు. ఈ ఘటన హైదరాబాద్‌లోని చింతల్‌లో చోటుచేసుకుంది. పద్మానగర్‌కు చెందిన జగత్‌ రోడ్డు దాటుతుండగా.. ఆ సమయంలో షాపూర్‌నగర్‌ నుంచి బాలానగర్‌ వైపు ద్విచక్రవాహనంపై ఇద్దరు యువకులు అతి వేగంగా దూసుకెళ్తూ రోడ్డు దాటుతున్న జగత్‌ను ఢీకొట్టారు. వేగంగా ఢీకొట్టడంతో జగత్‌ ఎగిరిపడ్డాడు. ఈ ప్రమాద దృశ్యాలు సీసీ కెమెరాలో నమోదయ్యాయి. ప్రమాదంలో జగత్‌ కాలికి గాయాలు కాగా.. బైక్‌పై వెళుతున్న ఇద్దరు స్వల్ప గాయాలతో బయటపడినట్లు పోలీసులు తెలిపారు. ద్విచక్రవాహనానికి నంబర్‌ ప్లేట్‌ లేదని, వారికి డ్రైవింగ్‌ లైసెన్స్‌ కూడా లేదని పోలీసులు వెల్లడించారు. ఘటనపై కేసు నమోదు చేసి దర్యాప్తు చేస్తున్నట్లు పేర్కొన్నారు.