ఓటు వేయం.. ఎన్నికలు బహిష్కరిస్తాం

కలెక్టరేట్‌ వద్ద గోవెన గ్రామస్థులు

ఆసిఫాబాద్‌, న్యూస్‌టుడే : తమ గ్రామానికి రహదారి, కనీస మౌలిక సదుపాయాలు లేవని, ఈ నెల 13న జరగనున్న పార్లమెంటు ఎన్నికలను బహిష్కరిస్తామని తిర్యాణి మండలం గోవెనకు చెందిన గ్రామస్థులు పేర్కొన్నారు. సోమవారం కలెక్టరేట్‌ వచ్చి కలెక్టర్‌ వెంకటేష్‌ దోత్రే వద్ద మొర వినిపించారు. అనంతరం వారు మాట్లాడుతూ.. తమ గ్రామంలో అయిదు గూడేలు ఉన్నాయని వందకు పైగా కుటుంబాలు నివసిస్తున్నట్లు తెలిపారు. ఇప్పటి వరకు రోడ్డు లేదని, తాగునీటి సమస్య ఉందని, విద్యుత్తు లేదని వాపోయారు. ఎన్నికల సమయంలో పార్టీల ప్రతినిధులు వచ్చి హామీలు ఇస్తున్నా అమలు కావడం లేదని చెప్పారు. ఈ సారి ఎన్నికల్లో తమ గ్రామంలోని పోలింగ్‌ బూత్‌కు ఎన్నికల అధికారులను పంపించవద్దని, తాము ఓటు వేయమని వినతి పత్రంలో పేర్కొన్నారు. స్పందించిన కలెక్టర్‌ సమస్యలు పరిష్కరిస్తామని, ఓటు హక్కు విధిగా వినియోగించుకోవాలని సూచించినట్లు గ్రామస్థులు తెలిపారు.