వైకాపా నాయకుడి ఇంట్లో వైద్యశాల

ఇటీవల ప్రారంభించిన ఆయుష్మాన్‌ భారత్‌ హెల్త్‌ అండ్‌ వెల్‌నెస్‌ కేంద్రం

చౌటపల్లి(వీరులపాడు), న్యూస్‌టుడే : వైకాపా నాయకుడి ఇంట్లో ప్రభుత్వ వైద్యశాల నిర్వహించడంపై తీవ్ర విమర్శలు వస్తున్నాయి. ఎన్నికల కోడ్‌కు విరుద్ధంగా అధికార పార్టీ నాయకుడి ఇంట్లో వైద్య సేవలు కొనసాగడం ఏమిటని స్థానికులు ప్రశ్నిస్తున్నారు. ఎన్టీఆర్‌ జిల్లా వీరులపాడు మండలం చౌటపల్లిలో ఆయుష్మాన్‌ భారత్‌ హెల్త్‌ అండ్‌ వెల్‌నెస్‌ కేంద్రం గతంలో ఎస్సీ కాలనీ సమీపంలోని అద్దె భవనంలో కొనసాగించారు. ఇటీవల కేంద్రానికి సొంత భవనం నిర్మించారు. ఈ మధ్య వైకాపా ఎమ్మెల్యే, ఎంపీ ఆర్భాటంగా ప్రారంభోత్సవం చేశారు. ఇటీవల భవనాన్ని ఖాళీ చేయాలని యజమాని కోరగా... ఎస్సీ కాలనీలో కమ్యూనిటీ భవనం అందుబాటులో ఉన్నప్పటికీ అధికారులు కేంద్రాన్ని స్థానిక వైకాపా నాయకుడి ఇంట్లోకి తరలించారు. ఆ నాయకుడి ఇల్లు ఎస్సీ కాలనీకి దూరంగా ఉంది. పైగా అతను వైద్యం కోసం వచ్చే వారి వద్ద వైకాపాకు అనుకూలంగా ప్రచారం చేస్తున్నట్లు స్థానికులు ఆరోపిస్తున్నారు. అధికార పార్టీ నాయకుడి ఇంట్లో కేంద్రం నిర్వహణపై అధికారులను ‘న్యూస్‌టుడే’ ప్రశ్నించగా, నూతన భవనం పనులు పూర్తి కానందున ఇంకా తమకు అప్పగించలేదని తెలిపారు.