Weather Forecast: మరో అల్పపీడనం.. ఆ ప్రాంతాలకు భారీ వర్షసూచన!

అమరావతి: దక్షిణ అండమాన్‌ సముద్రంలో మరో 12 గంటల్లో అల్పపీడనం ఏర్పడే అవకాశం ఉందని.. మరో 48 గంటల్లో మరింత బలపడుతుందని భారత వాతావరణ శాఖ(ఐఎండీ) తెలిపింది. ఈ అల్పపీడనం తూర్పు మధ్య బంగాళాఖాతానికి దగ్గరగా వస్తుందని వెల్లడించింది. దీంతో కోస్తాంధ్ర, రాయలసీమ, తమిళనాడు తీర ప్రాంతాల్లో భారీ వర్షాలు పడే అవకాశం ఉందని ఐఎండీ స్పష్టం చేసింది. డిసెంబర్‌ 3వరకు కోస్తాంధ్ర, ఒడిశా తీరప్రాంతాల్లో భారీ వర్షాలు పడే ఆస్కారం ఉందని తెలిపింది. ప్రస్తుతమున్న అల్పపీడన ప్రభావంతో నెల్లూరు జిల్లాలో వర్షాలు పడుతూనే ఉన్నాయి. మరో అల్పపీడనం నేపథ్యంలో ప్రభుత్వ యంత్రాంగం సహాయక చర్యలకు సన్నద్ధమవుతోంది.