గోడల మధ్య ఇరుక్కున్న బాలిక

తాడిపత్రి, న్యూస్‌టుడే: సరదాగా ఆడుకుంటూ ప్రమాదవశాత్తు రెండుగోడల మధ్య ఇరుక్కుని ఓ బాలిక తీవ్ర అవస్థలు పడింది. తాడిపత్రి మండలం ఆవులతిప్పాయపల్లికి చెందిన అవంతిక సోమవారం సాయంత్రం స్నేహితులతో సరదా ఆడుకుంటూ ఇంటి పక్కన ఉన్న రెండు గోడల మధ్యలో ఇరుక్కుపోయింది. బయటకు రాలేక బాలిక కేకలు వేయగా గమనించిన కుటుంబ సభ్యులు బాలికను బయటకు లాగేందుకు ప్రయత్నించారు. వారి ప్రయత్నం విఫలమవ్వడంతో పోలీసులకు, అగ్నిమాపక సిబ్బందికి సమాచారం అందించారు. పోలీసులు గంట పాటు శ్రమించి గోడలు పగులగొట్టి బాలికను బయటకు తీసినట్లు సీఐ లక్ష్మీకాంత్‌రెడ్డి తెలిపారు. బాలిక సురక్షితంగా బయటపడటంతో కుటుంబ సభ్యులు ఊపిరి పీల్చుకున్నారు.