మా అడ్డాలో ప్రచారమా?

తెదేపా వాహనంపై వైకాపా మూకల దాడి

పెళ్లకూరు, న్యూస్‌టుడే: పెళ్లకూరు మండలం చిల్లకూరులో తెదేపా ప్రచార వాహనం(ఆటో)పై వైకాపాకు చెందిన అల్లరి మూకలు దాడి చేసినట్లు బాధితుడు గోపీ పోలీసులకు ఫిర్యాదు చేశాడు. చిల్లకూరులో సోమవారం మధ్యాహ్నం ప్రచారంలో భాగంగా అనుమతి ఉన్న ఆటోతో పాటలు పెట్టి ఉండగా ఇదే గ్రామానికి  చెందిన కొందరు వ్యక్తులు ‘ఏందిరా ఇక్కడ ప్రచారం.. ఇది మా అడ్డా.. ఎవరి అనుమతితో తిరుగుతున్నావ్‌’ అంటూ దుర్భాషలాడి ఆటోకి ఉన్న పోస్టర్‌ని చించేశారు. ఇదే గ్రామానికి చెందిన ఎన్‌డీసీసీబీ ఛైర్మన్‌ కామిరెడ్డి సత్యనారాయణరెడ్డి తన అనుచరుల ద్వారా ఇలా చేయించినట్లు బాధితుడు పేర్కొన్నారు. మరోవైపు ఆటోని, ఫిర్యాదుదారుడిని పోలీసులు స్టేషన్‌కి తీసుకెళ్లారు. నిందితులను పట్టుకోవడంతో విఫలమైనట్లు ప్రతిపక్ష నేతలు ఆరోపిస్తున్నారు. ఇక్కడ సీసీ కెమెరాలున్నా నిందితులను పట్టుకోలేని స్థితిలో వ్యవస్థ ఉందన్నారు.