శుభకార్యంలో మజ్జిగ తాగిన 40 మందికి అస్వస్థత

గంగవరం, న్యూస్‌టుడే: శుభకార్యంలో మజ్జిగ తాగిన 40 మంది అస్వస్థతకు గురయ్యారు. ఈ ఘటన గంగవరం మండలం నలసానపల్లెలో శనివారం చోటుచేసుకుంది. స్థానికుల కథనం మేరకు.. గ్రామానికి చెందిన ఈశ్వరయ్య ఇంట్లో శుభకార్యానికి బంధువులు, స్నేహితులు వచ్చారు. ఎండల ప్రభావంతో ఇబ్బంది పడకుండా.. పలమనేరులోని ఓ దుకాణంలో పెరుగు కొని మజ్జిగ చేసి ఇచ్చారు. కొద్దిసేపటికే వారు వాంతులు, విరేచనాలతో తీవ్ర అస్వస్థతకు గురయ్యారు. దాదాపు 40 మందిని పలమనేరు ప్రభుత్వ ఆసుపత్రికి తరలించారు. సకాలంలో చికిత్స అందించడంతో ప్రమాదం తప్పింది. గడువు తీరిన పెరుగు ఇవ్వడంతోనే ఇలా జరిగిందనే ఆరోపణలున్నాయి.