ఓటమిని జగన్‌ ముందే ఒప్పుకొన్నారు

సినీ నటుడు పృథ్వీరాజ్‌

తిరుపతి (బైరాగిపట్టెడ): అంతర్జాతీయ స్థాయిలో అవినీతిలో పురస్కారాలు ఇవ్వదలుచుకుంటే ఆంధ్రప్రదేశ్‌ ముఖ్యమంత్రి జగన్‌మోహన్‌రెడ్డి, ఆయన మంత్రివర్గానికి ఇవ్వాలని సినీనటుడు, జనసేన నాయకుడు పృథ్వీరాజ్‌ ఎద్దేవా చేశారు. తిరుపతిలో ఎన్డీయే అభ్యర్థి ఆరణి శ్రీనివాసులు తరఫున సోమవారం ఆయన ఎన్నికల ప్రచారం నిర్వహించారు. ఈ సందర్భంగా మీడియాతో మాట్లాడుతూ జగన్‌లాంటి దోపిడీదారుడు ప్రపంచంలో లేరన్నారు. ఆలీబాబా 40 దొంగల ముఠా తరహాలో రాష్ట్రాన్ని దోచేశారని మండిపడ్డారు. తాము చేసిన అవినీతి, ఘనకార్యాలే తమను ఓడిస్తాయన్న విషయం జగన్‌మోహన్‌రెడ్డితో పాటు ప్రస్తుత ఎన్నికల్లో పోటీ చేస్తున్న వైకాపా అభ్యర్థులందరికీ ముందే తెలిసిపోయిందన్నారు. సొంత చెల్లెలే ఆయన అవినీతి, అరాచకాలను ఊరూరా చాటింపువేసి మరీ చెబుతున్నారన్నారు. రాష్ట్రంలో ఉమ్మడి ఎన్డీయే ప్రభుత్వం ఏర్పడనుందని విశ్వాసం వ్యక్తం చేశారు. ముద్రగడ పద్మనాభం, అంబటి రాంబాబులకు సొంత ఇంట్లోనే వ్యతిరేకత ఉందన్నారు. పిఠాపురం నుంచి పవన్‌ కల్యాణ్‌ రాష్ట్రంలోనే అత్యధిక మెజార్టీతో గెలుస్తారన్నారు.