వైకాపాకే ఓటేయాలని బెదిరింపు

వ్యతిరేకించిన లారీ ఓనర్లపై దాడి

సాంబమూర్తినగర్‌(కాకినాడ): కాకినాడ సంజయ్‌నగర్‌లోని లారీ ఓనర్స్‌ అసోసియేషన్‌ కార్యాలయం వద్ద సోమవారం ఘర్షణ వాతావరణం ఏర్పడింది. ఎన్నికల్లో కాకినాడ నగర ఎమ్మెల్యే ద్వారంపూడి చంద్రశేఖరరెడ్డికి అందరూ మద్దతు తెలిపి ఓటేయాలని స్థానిక లారీ ఓనర్స్‌ అసోసియేషన్‌ అధ్యక్షుడు, ఎమ్మెల్యే అనుచరుడు ఎన్‌ఎస్‌ రాజు హుకుం జారీ చేశారు. దీనిని కొందరు వ్యతిరేకించగా బెదిరింపులకు పాల్పడటంతో పాటు వారి లారీలకు సీరియల్‌ నంబర్లు ఇవ్వకుండా వేధింపులకు పాల్పడ్డారు. దీనిని ప్రశ్నించిన వారిపై దాడికి యత్నించారు. లారీ యూనియన్‌కు సంబంధించిన వాహనాలను నిబంధనలకు విరుద్ధంగా వైకాపా కార్యాలయం వద్ద ఉంచి ప్రచారానికి వినియోగించడంతో మరోవర్గం అడ్డు చెప్పింది. కాకినాడకు చెందిన లారీలకు సీరియల్‌  ఇతర ప్రాంతాలకు చెందిన వారికి కొత్తగా సభ్యత్వం ఇస్తుండటంపై ప్రశ్నించారు. దీనిపై అసహనానికి గురైన రాజు, అనుచరులు నిలదీసిన వారిపై దాడి చేశారు. దాడి చేసిన రాజు వర్గంపై కలెక్టర్‌, ఎస్పీకి ఫిర్యాదు చేయనున్నట్లు బాధిత లారీ ఓనర్లు తెలిపారు.