నేటి నుంచి ఉమ్మడి జిల్లాలో జగన్‌ పర్యటన

రావులపాలెం పట్టణం, న్యూస్‌టుడే: ఎన్నికల ప్రచారంలో భాగంగా సీఎం జగన్‌మోహన్‌రెడ్డి మంగళవారం ఉమ్మడి జిల్లాకు రానున్నారు. ఆ రోజు రాత్రి పశ్చిమ గోదావరి జిల్లా సిద్ధాంతం మీదుగా రావులపాలెం మండలం ఈతకోట చేరుకుంటారు. ఇక్కడ జాతీయ రహదారి చెంతన ఒక లేఔట్‌లో ఏర్పాటు చేసిన శిబిరంలో రాత్రి బస చేస్తారు. 17వ తేదీ శ్రీరామ నవమి నేపథ్యంలో ప్రచారానికి విరామం ఉంటుంది. 18వ తేదీ ఉదయం 10 గంటలకు రోడ్‌ షో చేసుకుంటూ రావులపాలెం మీదుగా రాజమహేంద్రవరం చేరుకుంటారు. ఈతకోటలో సీఎం బస చేయనున్న ప్రాంతంలో ఏర్పాట్లు చేస్తున్నారు. జిల్లా ఎస్పీ శ్రీధర్‌ సోమవారం ఏర్పాట్లను పరిశీలించి పోలీసులకు తగిన సూచనలు చేశారు.

పెరవలి: సీఎం పర్యటన నేపథ్యంలో తూర్పుగోదావరి జిల్లా ఎస్పీ జగదీష్‌ సోమవారం ఏర్పాట్లు పరిశీలించారు. తణుకు నుంచి పెరవలి, ఖండవల్లి మీదుగా రూట్‌మ్యాప్‌ను తనిఖీ చేశారు.