వైకాపా నాయకుల కవ్వింపు చర్యలు

మోతడక గ్రామ తెదేపా కార్యాలయం వద్ద అల్లరి చేస్తున్న వైకాపా శ్రేణులు

తాడికొండ, న్యూస్‌టుడే: తాడికొండ మండలం మోతడక గ్రామంలో శనివారం వైకాపా అభ్యర్థి మేకతోటి సుచరిత ఎన్నికల ప్రచారం నిర్వహించారు. ఈ నేపథ్యంలో గ్రామంలోని ప్రధాన రహదారి వద్ద ఉన్న తెదేపా కార్యాలయం వద్ద ఖాళీ ప్రచార రథంతో పాటు వైకాపా అల్లరి మూక వచ్చారు. వైకాపా జెండాలతో, కండువాలతో తెదేపా కార్యాలయం ఎదుట జై జగన్‌ అంటూ నినాదాలు చేస్తూ అక్కడే ఉన్న తెదేపా అభిమానులను రెచ్చగొట్టే ప్రయత్నం చేశారు. గ్రామంలో విధులు నిర్వహిస్తున్న ఏఎస్‌ఐ వచ్చి వారికి నచ్చజెప్పే ప్రయత్నం చేసిన ప్రయోజనం లేకపోయింది. ఇంత జరగుతున్న తెదేపా శ్రేణులు శాంతంగా ఉండటంతో వారితో వాగ్వాదానికి దిగారు. ద్విచక్రవాహనాల శబ్దాలు పెంచుతూ కవ్వించారు. తెదేపా నాయకులు వచ్చి సర్ది చెప్పడంతో వాతావరణం సద్దు మణిగింది.