రూ.70 లక్షల విలువైన బంగారు వజ్రాభరణాల చోరీ

జూబ్లీహిల్స్‌, న్యూస్‌టుడే: ఓ వ్యాపారి ఇంట్లో రూ.70లక్షల విలువైన బంగారు వజ్రాభరణాలు చోరీకి గురయ్యాయి. జూబ్లీహిల్స్‌ పోలీసుల కథనం ప్రకారం.. ఆసుపత్రి, హోటల్‌ రంగాలకు చెందిన డీవీఎస్‌ సోమరాజు జూబ్లీహిల్స్‌ రోడ్‌ నంబరు 62లో ఉంటున్నాడు. ఈనెల 4న కుటుంబ సభ్యులంతా శుభకార్యానికి వెళ్లారు. డైమండ్‌ నెక్లెస్‌, చంద్రహారం, 185 గ్రా. 4 బంగారు బిస్కెట్లు, 100 గ్రా. బంగారు గాజులు అల్మారాలో భద్రపరిచారు. 15న రాత్రి చూడగా కనిపించలేదు. పక్కనే మరో 50 లక్షల విలువైన ఆభరణాలు అలాగే ఉన్నాయి. ఇంట్లో నలుగురు పనిమనుషులు ఉండగా ఇద్దరు ఇంటి ఆవరణలో, మరో ఇద్దరు బయటి నుంచి వస్తుంటారు. ఈ ఘటనపై సోమరాజు మంగళవారం పోలీసులకు ఫిర్యాదు చేశారు. దాదాపు 70 లక్షల విలువైన బంగారు వజ్రాభరణాలు చోరీ అయినట్లు ఫిర్యాదు  చేశారు.