దశదిన కర్మకు వెళ్లి వస్తూ అనంత లోకాలకు..

గోనెల సుదర్శన్‌

శంకరపట్నం, న్యూస్‌టుడే: దశదిన కర్మకు వెళ్లి వస్తుండగా ఓ వృద్ధుడు రోడ్డు ప్రమాదానికి గురై అనంతలోకాలకు చేరిన ఘటన శంకరపట్నం మండలం కేశవపట్నం గ్రామ శివారులో జాతీయ రహదారిపై చోటు చేసుకొంది. ఎస్సై లక్ష్మారెడ్డి కథనం ప్రకారం.. సైదాపూర్‌ మండలం అమ్మనగుర్తికి చెందిన గోనెల సుదర్శన్‌ (68) ముగ్గురు కుమారులతో కలిసి ఆదివారం మానకొండూర్‌ మండలం కొండపల్కలలోని బంధువు దశదిన కర్మకు వెళ్లారు. ఆరోజు సాయంత్రమే సుదర్శన్‌ కుటుంబ సభ్యులు ఇంటికి చేరుకున్నారు. సోమవారం తెల్లవారుజామున సుదర్శన్‌ మనవరాలు శ్రీవర్షిణితో కలిసి.. బంధువైన హుజూరాబాద్‌ మండలం రాంపూర్‌కు చెందిన ముద్రవేణి ప్రభాకర్‌ కారులో బయలుదేరారు. కేశవపట్నం శివారు చేరుకోగానే కారు అదుపుతప్పి చెట్టును ఢీకొట్టింది. ముగ్గురికీ గాయాలవడంతో 108 వాహనంలో హుజూరాబాద్‌ ఏరియా ఆస్పత్రికి తరలించారు. మెరుగైన వైద్యం కోసం వరంగల్‌ ఎంజీఎం ఆస్పత్రికి తీసుకెళ్లగా చికిత్స పొందుతూ సుదర్శన్‌ మృతిచెందారు. ప్రభాకర్‌, శ్రీవర్షిణి చికిత్స పొందుతున్నారు. సుదర్శన్‌ కుటుంబ సభ్యుల ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై పేర్కొన్నారు.