లైట్లు లేవు... ఏసీలు పనిచేయవు

జగిత్యాల, న్యూస్‌టుడే: జగిత్యాల జిల్లా కేంద్ర ఆసుపత్రిలో ఆపరేషన్‌ థియేటర్లలో కనీస సౌకర్యాలు లేక ఇబ్బందులు ఎదురవుతున్నాయి. ఆసుపత్రిలో మూడు ఆపరేషన్‌ థియేటర్లు ఉండగా మూడింటిలో ఏసీలు పనిచేయకపోగా కనీసం లైట్లు కూడా లేకపోవడం ఆశ్చర్యం కలిగిస్తోంది. ప్రతిరోజు కనీసం అయిదారు శస్త్రచికిత్సలు జరుగుతుండగా రోగుల సంగతి అటుంచి వైద్యులు, సిబ్బంది సైతం ప్రస్తుత వేసవిలో చెమటలు కక్కాల్సి వస్తోంది. లైట్లు లేకపోవడంతో కిటికీలు, సెల్‌ఫోన్‌ వెలుతురు దిక్కవుతోంది. ప్రధాన ఆసుపత్రిని వైద్య కళాశాలకు అనుసంధానించగా పట్టించుకోకపోవడం ఆశ్చర్యం కలిగిస్తోంది.