‘మోసపూరిత హామీలు నమ్మొద్దు’

ఏర్గట్ల, మెండోరా, ముప్కాల్‌, బాల్కొండ న్యూస్‌టుడే: కాంగ్రెస్‌, భాజపాల మోసపూరిత హామీలు నమ్మొద్దని భారాస ఎంపీ అభ్యర్థి బాజిరెడ్డి గోవర్ధన్‌ అన్నారు. బాల్కొండ ఎమ్మెల్యే ప్రశాంత్‌రెడ్డితో కలిసి ఏర్గట్ల, ముప్కాల్‌, మెండోరా, బాల్కొండ మండలాల్లో బుధవారం ప్రచారం నిర్వహించారు. కాంగ్రెస్‌ ఆరు గ్యారంటీల పేరుతో మోసగిస్తే, భాజపా పసుపు బోర్డు పేరుతో రైతులను నమ్మించే ప్రయత్నం చేస్తుందన్నారు. కాంగ్రెస్‌ ఆరు గ్యారంటీల్లో ఏ ఒక్కటి పూర్తిగా అమలు కాలేదని మండిపడ్డారు. క్వింటా ధాన్యానికి రూ.500 బోనస్‌, రైతుబంధు పెంపు, కౌలు రైతులకు రూ.15వేలు వంటివి అమలు చేయలేదన్నారు. ప్రజాస్వామ్యంలో ప్రశ్నించే గొంతుకలు కావాలంటే కారు గుర్తుకు ఓటెయ్యాలని కోరారు. ఎమ్మెల్యే ప్రశాంత్‌రెడ్డి మాట్లాడుతూ.. భారాస హయాంలో అన్ని వర్గాల సంక్షేమం జరిగిందని, ఆ పనులను కాంగ్రెస్‌ ప్రభుత్వం ఆపాలని చూస్తుందని ఆరోపించారు. భాజపా ఇప్పటి వరకు రాష్ట్రానికి చేసిందేమి లేదన్నారు. ఆ రెండు పార్టీలను నమ్మి మోసపోవద్దన్నారు. బాజిరెడ్డి గోవర్ధన్‌ భారీ మెజార్టీతో గెలిపించాలని కోరారు. కార్యక్రమాల్లో ఎంపీపీ ఉపేందర్‌ రెడ్డి, వైస్‌ ఎంపీపీ లావణ్య, ఎంపీటీసీ సభ్యుడు మధు, భారాస మండలాధ్యక్షులు పూర్ణానందం, ముస్కు భూమేశ్వర్‌, జోగు నర్సయ్య, నాయకులు అశ్రఫ్‌, బర్మ చిన్న నర్సయ్య, సామ పద్మ, వెంకట్‌రెడ్డి, నర్సారెడ్డి తదితరులు పాల్గొన్నారు.