సమస్యాత్మక కేంద్రాలపై నిఘా

నంద్యాల పట్టణం, న్యూస్‌టుడే : జిల్లాలోని ఏడు అసెంబ్లీ నియోజకవర్గాల పరిధిలో 1983 పోలింగ్‌ కేంద్రాలు ఉన్నాయి. వీటిలో సాధారణ పోలింగ్‌ కేంద్రాలు 1528 కాగా సమస్యాత్మక, అత్యంత సమస్యాత్మక కేంద్రాలు 455 ఉన్నాయి. మొత్తం 1568 పోలింగ్‌ కేంద్రాల్లో వెబ్‌ కాస్టింగ్‌ అధికారులు ఏర్పాట్లు చేశారు. జిల్లాలో అధికార పార్టీకి వ్యతిరేక గాలి వీస్తోంది. విజయావకాశాలు సన్నగిల్లుతుండటంతో ఎన్నికల్లో అక్రమాలకు పాల్పడే ఆస్కారముందని ప్రతిపక్ష పార్టీల నాయకులు ఆందోళన వ్యక్తం చేస్తున్నారు. ఈ నేపథ్యంలో ఏడు అసెంబ్లీ నియోజకవర్గాల పరిధిలో పటిష్ట పోలీసు బందోబస్తు ఏర్పాటు చేయాలని కోరుతున్నారు. వైకాపాతో అంటకాగుతున్న పోలీసు అధికారులను తప్పించి వారి స్థానాల్లో నిష్పక్షపాతంగా ఉండే వారిని నియమించాల్సిన అవసరం ఉందంటున్నారు.

353 చోట్ల సూక్ష్మ పరిశీలకుల నియామకం

జిల్లాలోని 353 పోలింగ్‌ కేంద్రాల్లో సూక్ష్మ పరిశీలకులను నియమించనున్నారు. ఆళ్లగడ్డ నియోజకవర్గంలో 80, శ్రీశైలం 151, నందికొట్కూరు 163, నంద్యాల 217, బనగానపల్లి 209, డోన్‌ 269, పాణ్యం నియోజకవర్గంలో 299 పోలింగ్‌ కేంద్రాల్లో సూక్ష్మ పరిశీలకుల పర్యవేక్షణ కొనసాగనుంది.

వెబ్‌ కాస్టింగ్‌ డోన్‌లోనే ఎక్కువ

డోన్‌ నియోజకవర్గంలోని 92.43 పోలింగ్‌ కేంద్రాల్లో వెబ్‌ కాస్టింగ్‌ నిర్వహణకు ఏర్పాట్లు చేశారు. ఆళ్లగడ్డ నియోజకవర్గంలో 109 సమస్యాత్మక పోలింగ్‌ కేంద్రాలతో పాటు వివిధ పోలింగ్‌ కేంద్రాలను కలిపి 88.13 శాతం కేంద్రాల్లో వెబ్‌ కాస్టింగ్‌ ఏర్పాటు చేశారు. పాణ్యంలో 83.75, నంద్యాల 75.87, బనగానపల్లి 75.45, శ్రీశైలం 66.81, నందికొట్కూరు 64.94 శాతం కేంద్రాల్లో వెబ్‌ కాస్టింగ్‌ నిర్వహించనున్నారు.