మహిళ దారుణ హత్య

లక్ష్మమ్మ

నవాబ్‌పేట, న్యూస్‌టుడే : మండలకేంద్రానికి చెందిన పురుగుల లక్ష్మమ్మ(48) దారుణహత్యకు గురైనట్లు ఎస్సై అభిషేక్‌రెడ్డి తెలిపారు. ఎస్సై కథనం మేరకు.. నవాబ్‌పేట గ్రామంలో ఒంటరిగా జీవిస్తున్న మహిళను ఎవరో గుర్తు తెలియని వ్యక్తులు హత్య చేసి ఇంటికి తాళం వేసి వెళ్లిపోయినట్లు చెప్పారు. ఇంట్లో నుంచి దుర్వాసన రావడంతో ఇంటి చుట్టు ప్రక్కల వారు పోలీసులకు సమాచారం అందించారు. ఇంటికి వెళ్లి చూడగా శవం కుళ్లిపోయి కనిపించినట్లు చెప్పారు. ఈ హత్య నాలుగురోజుల క్రితం జరిగి ఉండవచ్చని వివరించారు. రూరల్‌ సీఐ గాంధీనాయక్‌ సమక్షంలో క్లూస్‌ టీం, డాగ్‌స్క్వాడ్‌లను పిలిపించి ఆధారాలను సేకరించినట్లు తెలియజేశారు. మృతురాలి కుమారుడు హైదరాబాద్‌ కొండాపూర్‌లో ఏఆర్‌ కానిస్టేబుల్‌గా పని చేస్తున్నట్లు పేర్కొన్నారు. మృతురాలి కోడలు వరలక్ష్మి ఫిర్యాదు మేరకు కేసు నమోదు చేసినట్లు తెలిపారు.