పెళ్లింట విషాదం..

రోడ్డు ప్రమాదంలో నవవరుడి దుర్మరణం

 వెంకటేశం

 చేగుంట: వివాహం జరిగి మూడు రోజులు కాలేదు.. సంతోషంగా ద్విచక్ర వాహనంపై కొత్త దంపతులిద్దరు వెళ్లగా.. మృత్యురూపంలో దూసుకొచ్చిన లారీ నూతన వరుడిని బలి తీసుకుంది. పెళ్లి సంబరంలో మునిగిన ఆ కుటుంబంలో తీరని విషాదం నెలకొంది. ఈ విషాదకర ఘటన మాసాయిపేట మండలం రామంతాపూర్‌ వద్ద చోటుచేసుకుంది. చేగుంట ఎస్‌ఐ బాల్‌రాజు తెలిపిన వివరాలు.. చిన్నశంకరంపేట మండలం జంగరాయికి చెందిన ఎర్రోళ్ల వెంకటేశ్‌ (23)కు మాసాయిపేట మండలం పోతాన్‌పల్లికి చెందిన యువతితో ఈనెల 26న వివాహం జరిగింది. పెళ్లి, విందు వేడుకలు ఘనంగా జరుపుకొన్నారు. సోమవారం రాత్రి నిద్ర చేసేందుకు దంపతులిద్దరూ కొత్త ద్విచక్రవాహనంపై జంగరాయి నుంచి నూతన వధువు స్వగ్రామం పోతాన్‌పల్లికి బయల్దేరారు. రామంతాపూర్‌ వద్ద వీరు వెళ్తున్న బైక్‌ను వెనక నుంచి అతివేగంగా వచ్చిన లారీ ఢీకొట్టడంతో వారిద్దరు కింద పడిపోయారు. వెంకటేశ్‌ తలపై నుంచి అదే లారీ వెళ్లడంతో అక్కడికక్కడే మృతిచెందాడు. అతడి భార్యకు తీవ్ర గాయాలయ్యాయి. స్థానికులు ఆమెను తూప్రాన్‌లోని ప్రభుత్వ ఆసుపత్రికి తరలించారు. మృతుడు గ్రామంలో తన సోదరుడు మహిపాల్‌తో కలిసి వ్యవసాయం చేస్తూ ఆటో నడిపించుకుంటూ జీవనం సాగిస్తున్నారు. ఈ ఘటనతో గ్రామంలో, కుటుంబంలో విషాదం నెలకొంది. ఇంట్లో కుటుంబసభ్యులు, బంధుమిత్రుల రోదనలు కలిచివేశాయి. మిత్రులు కన్నీటి పర్యంతం అయ్యారు. మృతుడి తల్లి సౌందర్య ఫిర్యాదు మేరకు కేసు నమోదు చేసి దర్యాప్తు చేపట్టారు.