ఓటర్లకు ఆహ్వానం

సామాజిక మాధ్యమాల్లో చక్కర్లు కొడుతున్న ఆహ్వాన పత్రిక

హుజూర్‌నగర్‌: ఓ శుభకార్యానికి ఆహ్వానం వస్తే అందరం ఆ తేదీ గుర్తు పెట్టుకుని తప్పకుండా హాజరవుతాం. అలాంటిది ఏకంగా మనదేశ ప్రజాస్వామ్య వ్యవస్థను పటిష్ఠం చేసే, మన భవితను తీర్చిదిద్దే ఓటుకు రమ్మని ఓటరును ఆహ్వానిస్తే ఎలా ఉంటుంది అనుకున్నారేమో..! ఆలోచన వచ్చిందే తడవుగా ఒక వినూత్న ఆహ్వాన పత్రిక తయారు చేసి సామాజిక మాధ్యమాల్లో ఓటరును ఓటుకు రమ్మంటూ ఆహ్వానం పంపుతున్నారు. ఓటరు తప్పకుండా ఓటు హక్కును వినియోగించుకొనేలా ఆహ్వానిస్తూ సందేశం పంపుతున్నారు. ముహూర్తం: ఈనెల 13న ఉదయం 7 గంటల నుంచి సాయంత్రం 6 గంటల వరకు, వేదిక: పోలింగ్‌ కేంద్రం, విందు: ఐదేళ్లపాటు శక్తిమంతమైన ప్రజాస్వామ్య ఫలాలు అంటూ ఆంగ్లంలో ముద్రించిన ఆహ్వాన పత్రిక సామాజిక మాధ్యమాల్లో చక్కర్లు కొడుతోంది. ఇది అందరినీ ఆకర్షించడమే కాకుండా ఆలోచింపజేస్తోంది. ఓటింగ్‌ శాతం పెంచుకునేందుకు ఇలాంటి చిట్కాలు కూడా ఎంతో తోడ్పడతాయంటున్నారు నెటిజన్లు.