చోరీలకు పాల్పడిన నిందితుడి రిమాండ్‌

వివరాలు వెల్లడిస్తున్న డీఎస్పీ సత్యనారాయణ

బాన్సువాడ పట్టణం, న్యూస్‌టుడే: మద్యానికి బానిసై చోరీలు చేసిన నిందితుడిని రిమాండ్‌కు పంపినట్లు డీఎస్పీ సత్యనారాయణ పేర్కొన్నారు. పట్టణంలోని కార్యాలయంలో గురువారం ఏర్పాటు చేసిన సమావేశంలో ఆయన వివరాలు వెల్లడించారు. ఈ నెల 26న మద్నూర్‌లో మహాజన్‌ బాలాజీ అనే వ్యక్తి ఇంట్లో 25తులాల బంగారం, రూ.16వేల నగదును అదే గ్రామానికి చెందిన ఉప్పరివార్‌ శ్రీను అపహరించాడు. దీని విలువ మొత్తం రూ.13.31లక్షలు ఉంటుంది. 27న సాయంత్రం పెట్రోలింగ్‌ చేస్తున్న సమయంలో అనుమానాస్పదంగా చేతిలో సంచి పట్టుకొని తిరుగుతున్న అతడిని పట్టుకొని విచారించగా మద్యానికి బానిసై చోరీలు చేస్తున్నట్లు అంగీకరించాడు. అతని నుంచి సొత్తు రికవరీ చేసినట్లు తెలిపారు. మూడు నెలల కిందట బాగన్న మఠానికి సంబంధించిన షటర్స్‌లో సైతం దొంగతనం చేశాడని వివరించారు. సమావేశంలో బిచ్కుంద సీఐ నరేష్‌, ఎస్సై శ్రీకాంత్‌, సిబ్బంది ఉన్నారు.