మత్తు పదార్థం పట్టివేత.. నలుగురి అరెస్టు

వివరాలు వెల్లడిస్తున్న భిక్కనూరు సీఐ సంపత్‌

భిక్కనూరు, న్యూస్‌టుడే: నిషేధిత మత్తు పదార్థం అల్ఫ్రాజోలం సరఫరా చేస్తున్న నలుగురిని భిక్కనూరు పోలీసులు అరెస్టు చేసి జైలుకు పంపారు. ఆదివారం భిక్కనూరు సీఐ సంపత్‌ తెలిపిన వివరాల ప్రకారం.. శనివారం సాయంత్రం పెద్దమల్లారెడ్డి శివారులో కారులో అక్రమంగా మత్తు పదార్థాలు తరలిస్తున్నారనే సమాచారంతో పోలీసులు మాటువేసి ముగ్గురిని పట్టుకున్నారు. వారు ఇచ్చిన సమాచారంతో జంగంపల్లి శివారు బీటీఎస్‌ వద్ద మరో వ్యక్తిని అదుపులోకి తీసుకున్నారు. నిందితులుగా గుర్తించిన వారిలో నిజామాబాద్‌ జిల్లా నవీపేట మండలం అబ్బాపూర్‌కు చెందిన గొల్లపల్లి నరేష్‌గౌడ్‌, మాక్లూర్‌కు చెందిన ఎల్లగోని సంతోష్‌గౌడ్‌, సంగం గ్రామానికి చెందిన కేసరి మల్లికార్జున్‌గౌడ్‌, కామారెడ్డి జిల్లా గాంధారికి చెందిన భీమగోని దత్తాత్రిగౌడ్‌ ఉన్నారు. వారి నుంచి కారు, రూ.2.50 లక్షల విలువైన 248 గ్రాముల అల్ప్రాజోలం, 4 చరవాణులు, రూ.37,020 నగదు స్వాధీనం చేసుకున్నామన్నారు. వీరిపై కేసు నమెదు చేసి కామారెడ్డి కోర్టులో హాజరుపర్చగా న్యాయమూర్తి వారికి 14 రోజులు రిమాండ్‌ విధించారు. వారిని నిజామాబాద్‌ జైలుకు తరలించారు. మరో ఇద్దరు నిందితులు పరారీలో ఉన్నారు. ఎస్సై సాయికుమార్‌, పోలీసు సిబ్బంది ఉన్నారు.