మానసిక రోగులకు కౌన్సెలింగ్‌ ఇవ్వాలి

రామారెడ్డి: మానసిక రోగులకు చికిత్స, కౌన్సెలింగ్‌తో వ్యాధిని నయం చేయవచ్చని మానసిక వైద్యుడు రమణ అన్నారు. మంగళవారం రామారెడ్డి ప్రాథమిక ఆరోగ్య కేంద్రంలో ఆరోగ్య కార్యకర్తలకు, వైద్య సిబ్బందికి అవగాహన కల్పించారు. ఈ సందర్భంగా ఆయన మాట్లాడుతూ సమాజంలో మానసిక ఆరోగ్యం సరిగా లేనివారు తమలో తాము మదనపడుతూ ఆత్మహత్య చేసుకుంటున్నారని పేర్కొన్నారు. అలాంటి వ్యక్తులను ఆరోగ్య సిబ్బంది గుర్తించి అవగాహన కల్పించాలని, ఉచిత టోల్ ఫ్రీ నెంబర్ 14416 నీ సంప్రదించాలని సూచించారు. కార్యక్రమంలో వైద్యుడు సురేష్, మానసిక ఆరోగ్య సామాజిక కార్యకర్త రాహుల్ కుమార్, వైద్య సిబ్బంది భీం, జానకి, ఆశా కార్యకర్తలు పాల్గొన్నారు.