నేడు నాలుగో విడతకు నోటిఫికేషన్‌

భువనేశ్వర్‌, న్యూస్‌టుడే: రాష్ట్రంలో నాలుగు విడతల్లో పోలింగ్‌ జరగనుంది. తుది విడతగా జూన్‌ 1న మయూర్‌భంజ్‌, జాజ్‌పూర్‌, జగత్సింగ్‌పూర్‌, భద్రక్‌, బాలేశ్వర్‌, కేంద్రపడ లోక్‌సభ స్థానాలు, వాటి పరిధుల్లోని 42 అసెంబ్లీ స్థానాలకు పోలింగ్‌ నిర్వహిస్తారు. దీనికి సంబంధించి ఎన్నికల సంఘం మంగళవారం నోటిఫికేషన్‌ జారీ చేయనుంది. దీంతో నామినేషన్ల దాఖలు ప్రక్రియ ప్రారంభమై ఈ నెల 14 వరకు కొనసాగుతుంది. 15న నామినేషన్ల పరిశీలన, 17న ఉపసంహరణకు తుది గడువు.

మూడో విడత సమాప్తం: మూడోవిడత పోలింగ్‌ ఈ నెల 25న సంబల్‌పూర్‌, పూరీ, భువనేశ్వర్‌, కేంఝర్‌, కటక్‌, ఢెంకనాల్‌ లోక్‌సభ స్థానాలు, వాటి పరిధుల్లోని 42 అసెంబ్లీ స్థానాలకు పోలింగ్‌ జరగనున్న సంగతి తెలిసిందే. ఆయాచోట్ల సోమవారం నామినేషన్ల దాఖలు ప్రక్రియ ముగిసింది.