కుల వివక్ష కేసుల్లో సత్వర న్యాయం

మాట్లాడుతున్న కలెక్టరు నిశాంత్‌కుమార్‌, చిత్రంలో ఎస్పీ విద్యాసాగర్‌నాయుడు, జేసీ ఆనంద్‌, సబ్‌ కలెక్టరు నూరుల్‌కమర్‌

పార్వతీపురం, న్యూస్‌టుడే: అంటరానితనం, కుల   వివక్ష వంటి సాంఘిక దురాచారాలను అదుపు చేయడానికి యంత్రాంగం కృషి చేయాలని కలెక్టరు నిశాంత్‌కుమార్‌ సూచించారు. శనివారం కలెక్టరేట్‌లో జిల్లా విజిలెన్సు, మానటరింగ్‌ కమిటీ సమావేశం నిర్వహించారు. ఎస్పీ విద్యాసాగర్‌నాయుడు, జేసీ ఆనంద్‌, సబ్‌ కలెక్టరు నూరుల్‌కమర్‌, డీఆర్వో వెంకటరావు తదితరులతో చర్చించారు. అంటరానితనం, కుల వివక్ష ఘటనలు ఎక్కడ చోటుచేసుకున్నా వెంటనే విచారణ చేపట్టి చర్యలు తీసుకోవాలన్నారు. దాడులు, అత్యాచారాలకు గురైతే సత్వర న్యాయం చేసి ప్రభుత్వ పరంగా పరిహారం చెల్లించడానికి చర్యలు తీసుకోవాలని సూచించారు. జిల్లాలో ఇప్పటి వరకు నమోదైన 10 కేసుల స్థితిగతులపై సమీక్షించారు. డివిజన్‌ స్థాయిలో కమిటీలు ఏర్పాటు చేసి ప్రజల్లో అవగాహన కల్పించాలని ఆదేశించారు.