నేటికీ తగ్గని పింఛనుదారుల ఆందోళన

బలిజిపేట: బలిజిపేటలో అతి పెద్ద బ్యాంకు శాఖగా పేరొందిన యూనియన్‌ బ్యాంకునకు పింఛనుదారుల తాకిడి ఇంకా తగ్గలేదు. బ్యాంకు ఖాతాలు చెల్లుబాటు కాని వృద్ధులంతా తమ ఖాతాలను బతికించుకునేందుకు శుక్రవారం కూడా వరుస కట్టారు. వీరికి బ్యాంకుశాఖ అధికారులు అందుబాటులో మంచినీరు, గుడారాలు ఏర్పాటు చేశారు. ఇక్కడ పింఛనుదారులకు ఎలాంటి అసౌకర్యం కలగకుండా ఉండేందుకు పలగర, చిలకలపల్లి, నారాయణపురం, వెంగాపురం, నూకలవాడ, తుమరాడ గ్రామాల బ్యాంకు కరస్పాండెంట్లు ఆధార్‌ నంబర్లతో బయోమెట్రిక్‌ వేయించుకుని వెనువెంటనే నగదు చెల్లింపులు చేపడుతున్నారు. వీరికి అవసరమైన నగదును బ్యాంకు అధికారులు అందిస్తూ ఎలాంటి అసౌకర్యం కలుగకుండా చేస్తున్నారు.