గుండ్లకమ్మలో ఈతకెళ్లి యువకుడి మృతి

మద్దిపాడు, న్యూస్‌టుడే: గుండ్లకమ్మలో ఈతకెళ్లి యువకుడు మృతి చెందిన సంఘటన సోమవారం వెలుగుచూసింది. పోలీసులు తెలిపిన వివరాల మేరకు.. ఒంగోలులోని రాజగోపాల్‌ నగర్‌కు చెందిన గొరిపర్తి సాంబశివరావు(35) ఆటో నడుపుకుంటూ జీవనం సాగిస్తున్నారు. ఆదివారం సాయంత్రం స్నేహితులతో కలిసి గుండ్లకమ్మ జలాశయంలో వద్ద సరదాగా ఈత కొట్టేందుకు వెళ్లి అక్కడ ప్రమాదవశాత్తు నీటిలో మునిగిపోయాడు. కుటుంబ సభ్యులు డ్యాం వద్దకు వెళ్లి చూడగా ఆచూకీ తెలియలేదు. సోమవారం ఉదయం మృతదేహం నీటిలో తేలియాడుతూ కనపడటంతో స్థానికులు పోలీసులకు సమాచారం ఇచ్చారు. సంఘటన స్థలానికి చేరుకున్న పోలీసులు మృతదేహాన్ని బయటకు తీయించారు. తండ్రి భద్రయ్య ఇచ్చిన ఫిర్యాదు మేరకు కేసు నమోదు చేసినట్లు ఏఎస్సై రమేష్‌ పేర్కొన్నారు.