కూటమిదే పక్కా విజయం

దర్శి ఎన్నికల ప్రచారంలో తెదేపా అధినేత చంద్రబాబు

ప్రసంగిస్తున్న చంద్రబాబు.. చిత్రంలో తెదేపా, జనసేన నేతలు వెంకట్‌, పాపారావు, రవికుమార్‌, అభ్యర్థులు గొట్టిపాటి లక్ష్మి, మాగుంట

‘సభకు వచ్చిన జనం చూపుతున్న ఉత్సాహం.. యువత, మహిళల కేరింతలు చూస్తుంటే దర్శిలో మన విజయం పక్కా అని తేలిపోయింది. ఈ సారి కచ్చితంగా తెదేపా జెండా ఎగరేస్తాం. అందుకు వారమే సమయం ఉంది. నాయకులు, కార్యకర్తలు అజాగ్రత్త వహించొద్దు. సూపర్‌ సిక్స్‌ పథకాలు, కూటమి మ్యానిఫెస్టోను జనంలోకి విస్తృతంగా తీసుకెళ్లాలి’ అని తెదేపా అధినేత నారా చంద్రబాబు నాయుడు కోరారు. దర్శిలో శనివారం నిర్వహించిన ప్రజాగళం ఎన్నికల ప్రచార సభలో చంద్రబాబు పాల్గొని ప్రసంగించారు. తెదేపా, జనసేన, భాజపా కలిసి బరిలో నిలిచిన తర్వాత ఇక మరో పార్టీకి అవకాశం లేనే లేదన్నారు. మండుటెండలో గంటలపాటు నిరీక్షించి.. ఎంతో ఓపికగా తన ప్రసంగాన్ని విన్న అందరికీ కృతజ్ఞతలు తెలిపారు. ప్రజలు చూపిన అభిమానానికి మురిసిపోయారు. మిమ్మల్ని చూసి ఎండే భయపడిపోతోందని సభకు హాజరైన వారిని చూసి ప్రశంసించారు. చంద్రబాబు మాట్లాడుతున్నంత సేపు సభికుల కేరింతలు కొడుతూ ఉత్సాహాన్ని ప్రదర్శించారు.

ఈనాడు, ఒంగోలు; దర్శి, న్యూస్‌టుడే

సభకు హాజరైన జన సందోహం

ప్రచార సభలో జనసేనాని చిత్రంతో సందడి...

ప్లకార్డులు ప్రదర్శిస్తూ తెలుగు తమ్ముళ్లు, మహిళల ఉత్సాహం