తేయాకు తోటల కార్మికులతో ముచ్చటించిన రాహుల్‌

విద్యార్థినులతో కరచాలనం చేస్తున్న రాహుల్‌

సైదాపేట, న్యూస్‌టుడే: నీలగిరిలో తేయాకు తోటల కార్మికులతో కాంగ్రెస్‌ అగ్రనేత రాహుల్‌గాంధీ ముచ్చటించారు. సోమవారం తాలూరు దేవాలయానికి వెళ్లిన రాహుల్‌ అక్కడి సమావేశహాలులో వారితో మాట్లాడారు. కళాశాల విద్యార్థినులతో కూడా ముచ్చటించారు. నీలగిరి డీఎంకే అభ్యర్థి ఎ.రాజాకు మద్దతుగా ప్రచారం చేసేందుకు సోమవారం రాహుల్‌గాంధీ గూడలూరు దగ్గర బందలూరులోని ప్రైవేటు కళాశాలకు హెలికాప్టర్‌లో చేరుకున్నారు. ఆయన్ను స్వాగతించేందుకు కాంగ్రెస్‌, డీఎంకే నేతలు గూడలూరు హెలికాప్టర్‌ బేస్‌లో వేచి ఉన్నారు. రాహుల్‌ను కలిసేందుకు అధికారులు నిర్వాహకులను అనుమతించకపోవటంతో వాగ్వాదం జరిగింది. పోలీసులు వారిని సమాధానపరిచి అక్కడ నుంచి పంపేశారు. అనంతరం బందలూరులో జరిగిన కార్యక్రమంలో ఎ.రాజాకు మద్దతుగా రాహుల్‌గాంధీ ప్రచారం చేశారు.