ఐలాండ్‌ మైదానానికి బ్రాడ్వే బస్టాండ్‌

ఆర్కేనగర్‌, న్యూస్‌టుడే: చెన్నై బ్రాడ్వే బస్టాండ్‌ను తాత్కాలికంగా ఐలాండ్‌ మైదానానికి మార్చనున్నట్లు చెన్నై కార్పొరేషన్‌ ప్రకటించింది. ఇది 2002కు ముందు రాష్ట్రంలోని అన్ని ప్రాంతాలకు వెళ్లే ముఖ్యమైన బస్టాండ్‌గా ఉండేది. ఆ తర్వాత కోయంబేడు బస్టాండ్‌ ఏర్పాటు చేసి ప్రయాణికులకు అందుబాటులోకి తీసుకొచ్చారు. బ్రాడ్వే బస్టాండ్‌ను చెన్నై కార్పొరేషన్‌ బస్సులు నడిచే ప్రాంతంగా మార్చారు. అంతదూరంలో ఉన్న కోయంబేడుకు వెళ్లి బస్సులు ఎక్కలేమని ప్రజలు ఆందోళనలు చేశారు. ఆ తర్వాత కోయంబేడు ఇతర ప్రాంతాలకు వెళ్లే బస్టాండ్‌గా, స్థానిక బస్టాండ్‌గాను ఏర్పాటుచేశారు. ‘మల్టీ మోడల్‌ ఇంటిగ్రేషన్‌’ ట్రాన్స్‌పోర్ట్‌ టెర్మినల్‌ నిర్మించేందుకు దానిని తరలించే యోచనలో ఉన్నట్లు తెలిసింది. ఇందుకోసం ఐలాండ్‌ మైదానంలో చెన్నై కార్పొరేషన్‌ ద్వారా రూ.5 కోట్లతో మౌలిక వసతులు కల్పించనున్నారు. కొద్దినెలల్లోనే తరలించనున్నారు. ఆ తర్వాత బ్రాడ్వే బస్టాండ్‌ కూల్చివేసి ట్రాన్స్‌పోర్ట్‌ టెర్మినల్‌ నిర్మాణం ప్రారంభమవుతుంది. అక్కడ తొమ్మిది అంతస్తులతో కూడిన వాణిజ్య ప్రాంగణంతో కూడిన బస్టాండ్‌ నిర్మించనున్నారు.