గడువు తీరిన బీరు తాగి యువకుల అస్వస్థత

టాస్మాక్‌ సిబ్బంది సస్పెన్షన్‌

వేళచ్చేరి, న్యూస్‌టుడే: మైలాడుదురై జిల్లా సీర్గాళి సమీప తెన్నంగుడిలోని ఓ ప్రభుత్వ మద్యం దుకాణంలో ఇద్దరు యువకులు రెండు రోజుల క్రితం బీరును కొనుగోలు చేసి తాగారు. అది తాగిన కొద్ది సేపటికే వారు అస్వస్థతకు గురయ్యారు. వెంటనే అక్కడున్న వారు.. ఇద్దరిని చికిత్స నిమిత్తం ఆసుపత్రికి తరలించారు. ఈ ఘటనపై పోలీసులు కేసు నమోదు చేసి దర్యాప్తు జరిపారు. బాధితులు మద్యం దుకాణంలో గడువు తీరిన బీర్‌ను కొనుగోలు చేసి తాగి అనారోగ్యానికి గురైనట్లు గుర్తించారు. ఈ విషయమై అధికారులు విచారణ జరిపి ఉన్నతాధికారులకు నివేదిక సమర్పించారు. ఆ మేరకు  నిర్లక్ష్యంగా వ్యవహరించిన మద్యం దుకాణం సేల్స్‌మేన్‌ శంకర్‌, సూపర్‌ వైజర్‌ వడివేల్‌తో సహా ముగ్గురిని సస్పెండు చేస్తూ బుధవారం అధికారులు ఉత్తర్వులు జారీచేశారు.