ముగిసిన ఓటు నమోదు గడువు

72,386 దరఖాస్తుల రాక

వన్‌టౌన్‌, న్యూస్‌టుడే: జిల్లాలో కొత్తగా ఓటు నమోదు చేసుకోవడానికి సోమవారంతో గడువు ముగిసింది. జనవరి 23 నుంచి ఈనెల 15వ తేదీ వరకు  72,386 దరఖాస్తులు వచ్చాయి. వీటిలో 49,083 దరఖాస్తులను ఆమోదించి వారి పేర్లను ఓటరు జాబితాల్లో చేర్చారు. 12,761 దరఖాస్తులను తిరస్కరించారు. ఇంకా 10,542 విచారణ దశలో ఉన్నాయి. జనవరి 22న తుది ఓటరు జాబితాలు వెల్లడించిన తరువాత...ఇంకా అర్హులుంటే ఆన్‌లైన్‌లో దరఖాస్తు చేసుకోవడానికి ఈనెల 15వ తేదీ వరకు గడువు ఇచ్చారు. దరఖాస్తుల పరిశీలన, పరిష్కరించేందుకు ఏడు రోజుల సమయం ఉంది. ఈ కారణంగా ఈనెల 21వ తేదీ నాటికి అసెంబ్లీ నియోజకవర్గాల వారీ తుది ఓటర్ల సంఖ్య తేలనుంది. తుది జాబితాలతో పోలిస్తే జిల్లా వ్యాప్తంగా 50వేలకుపైగా ఓటర్లు అదనంగా పెరగనున్నారు.