చేసిన పనులకు బిల్లులివ్వకపోతే చనిపోతా..

తాజా మాజీ సర్పంచి ఆవేదన

రఘునాథపల్లి, న్యూస్‌టుడే : ‘పంచాయతీ పాలకవర్గం తీర్మానం చేసిన ప్రకారం ప్రజలకు అత్యవసర పనులు చేస్తే.. ఆర్‌డబ్ల్యూఎస్‌ అధికారులు బిల్లులు చేయకుండా అవస్థలు పెడుతున్నారు. పనులకు తెచ్చిన అప్పులు తీర్చలేకపోతున్నాను. బిల్లులు ఇవ్వకపోతే ఆత్మహత్య చేసుకుంటానంటూ’ జనగామ జిల్లా రఘునాథపల్లి మండలం ఖిలాషాపురం తాజా మాజీ సర్పంచి ముప్పిడి శ్రీధర్‌ బుధవారం సామాజిక మాధ్యమాల్లో వీడియో, ప్రకటన విడుదల చేయడం కలకలం సృష్టించింది. గ్రామంలో డ్రైనేజీ వ్యవస్థ చిన్నాభిన్నమై ప్రజలు అవస్థలు పడుతుంటే ఆర్‌డబ్ల్యూఎస్‌ అధికారులు, పంచాయతీ తీర్మానం మేరకే రూ.15 లక్షల పనులు చేశానని పేర్కొన్నాడు. పదవీకాలం ముగిసినా ఇంతవరకు ఎంబీ రికార్డు చేయడం లేదని, పైగా సంబంధిత ఏఈ ఎందుకు పనులు చేశావంటూ బుకాయించడంతోపాటు, పంచాయతీ తీర్మానాన్ని చింపేయాలని పంచాయతీ కార్యదర్శికి హుకుం జారీ చేశాడని ఆరోపించారు. ఉన్నతాధికారులకు తెలిపినా స్పందన లేదని ఆవేదన వెలిబుచ్చాడు. త్వరగా బిల్లులు చెల్లించాలని లేకపోతే చనిపోతానని సామాజిక మాధ్యమాల్లో విడుదల చేసిన వీడియో, ప్రకటన వైరల్‌ అవుతోంది.