‘ఇన్నర్‌ రింగ్‌రోడ్డు’ భూ బాధితుల ఆందోళన

రంగశాయిపేట, న్యూస్‌టుడే: ఖిలావరంగల్‌ పరిసర ప్రాంతాల మీదుగా నిర్మిస్తున్న అంతర వలయ రహదారి(ఇన్నర్‌ రింగ్‌ రోడ్డు) భూ బాధితులు మంగళవారం ఆందోళనకు దిగారు. వరంగల్‌- ఖమ్మం ప్రధాన రహదారి మీదుగా ఆర్టీఏ కార్యాలయం, పుల్లాయికుంట, ఖిలావరంగల్‌ మట్టికోటను ఆనుకొని గొర్రెకుంట వరకు నూతనంగా నిర్మిస్తున్న రహదారి పనులను వారు అడ్డుకున్నారు. పరిహారం ఇచ్చే వరకు పనులు నిలిపి వేయాలంటూ నినాదాలు చేస్తూ గుత్తేదారుతో వాగ్వాదానికి దిగారు. రోడ్డు కోసం ‘కుడా’ అధికారులు 390 మంది రైతుల నుంచి భూములు సేకరించగా.. ఇప్పటి వరకు 180 మందికి పరిహారం ఇచ్చారు. మరో 210 మందికి డబ్బులు ఇవ్వాల్సి ఉంది. ఖిలావరంగల్‌ ప్రాంతానికి చెందిన బాధితులకు సుమారు రూ.83 కోట్లు చెల్లించాల్సి ఉందని రైతులు ఆవేదన వ్యక్తం చేశారు. మిల్స్‌కాలనీ సీఐ మల్లయ్య ఘటనా స్థలానికి చేరుకొని సర్దిచెప్పారు. ఎన్నికల కోడ్‌ ఉన్నందున ఆందోళన చేయొద్దని సూచించారు. దీంతో బాధితులు పోలీస్‌స్టేషన్‌కు తరలివెళ్లారు. పనులకు ఆటంకం కలిగించిన 9మందిపై కేసు నమోదు చేసినట్లు బాధితులు తెలిపారు.