ఎట్టకేలకు తారు పడింది..!

వెంకటాపురం, న్యూస్‌టుడే: వెంకటాపురం మండలంలోని రాచపల్లి-మొట్లగూడెం రహదారికి ఎట్టకేలకు తారు పడింది. రూ.1.13 కోట్ల అంచనా వ్యయంతో చేపట్టిన ఈ మార్గం ఏడాదిగా అసంపూర్తిగానే వెక్కిరించింది. ఈ సమస్యపై ‘ఈనాడు’లో పలు కథనాలు ప్రచురితమయ్యాయి. మార్చి 31 తేదీన ‘కంకర పరిచి.. తారు మరిచి’ అనే శీర్షికతో ప్రచురితమైన కథనానికి ఆర్‌అండ్‌బీ ఇంజినీరింగ్‌ అధికారులు స్పందించారు. రెండు రోజుల కిందట గుత్తేదారు 1.20 కి.మీ పరిధికి చెందిన ఈ మార్గంపై తారు వేశారు. దశాబ్ధాలుగా బురొద రోడ్డుపైనే అవస్థలు పడే గిరిజనానికి ఇన్నాళ్లకు తారు రహదారి చేరువ కావడంతో స్థానికులు హర్షం వ్యక్తం చేస్తున్నారు.