నవ్విపోతారని.. మాయం చేసేశారు..!

వైఫల్యాన్ని కప్పిపుచ్చుకునేందుకు శిలాఫలకం తొలగింపు

శిలాఫలకం తొలగించిన ప్రదేశం ఇదే..

మార్టేరు, న్యూస్‌టుడే: రెండేళ్ల కిందట పెనుమంట్ర మండలం మాముడూరులో ఆర్‌బీకే నిర్మాణానికి సాక్షాత్తు ఎమ్మెల్యే శ్రీరంగనాథరాజు శంకుస్థాపన చేసిన శిలాఫలకాన్నే మాయం చేసేశారు. 2021 జూన్‌ 19న స్థానిక ఎమ్మెల్యే ఆర్బీకే పనులకు శంకుస్థాపన చేశారు. ఈ మార్గంలో రాకపోకలు సాగించే వారికి ఈ ఏడాది ఫిబ్రవరి వరకు శిలాఫలకం దిష్టిబొమ్మలా కనిపిస్తూ ఉండేది. ఈ పరిస్థితుల్లో మార్చిలో శిలాఫలకంతో కూడిన దిమ్మ నేలమట్టమయ్యింది. ఈ విషయమై మార్చి 9న ‘ఈనాడు’లో ‘నాడు అలా.. జాప్యమై నేడు ఇలా..!’ శీర్షికతో కథనం ప్రచురితమైంది. దీంతో దిమ్మ శకలాలను తొలగించి శిలాఫలకాన్ని అక్కడి నుంచి తరలించేశారు. వాస్తవానికి మండలంలో ముందస్తుగానే ఈ నిర్మాణానికి శ్రీకారం చుట్టారు. కానీ ఆ దిశగా పనులు చేపట్టలేదు. ఎన్నికల వేళ పనులు ప్రారంభంగాని ఈ శిలాఫలకాన్ని      ఈ ప్రాంతం నుంచి తరలించడం చర్చనీయాంశంగా మారింది.