Kadapa: నెలలో 101 సార్లు ఫోన్‌.. వాహన షోరూంపై బాధితుడు ఫిర్యాదు

కడప నేరవార్తలు, న్యూస్‌టుడే: క్రెడిట్‌ కార్డులు, సర్వీసింగ్‌, రీఛార్జి పేరిట తరచూ ఫోన్‌కాల్స్‌ వస్తుంటాయి..  ఆ నెంబర్లను బ్లాక్‌ చేసినా మార్చి చేస్తుంటారు.. దీంతో వినియోగదారులకు ఇక్కట్లు తప్పడం లేదు. ఇలా ఓ వ్యక్తికి ఒకటి కాదు.. రెండు కాదు.. నెలలో 101 సార్లు ఫోన్‌ చేసి తీవ్ర ఇబ్బందులకు గురిచేయడంతో ఒకటో పట్టణ ఠాణాకు వచ్చి ఫిర్యాదు చేశారు. దీనికి సంబంధించి వివరాలిలా ఉన్నాయి... కడప మోచంపేటకు చెందిన దిలీప్‌ ఏడాది కిందట నగరంలోని ఓ షోరూంలో ద్విచక్రవాహనం కొన్నారు. అప్పుడప్పుడు అక్కడి సిబ్బంది ఫోన్లు చేసి సర్వీసు ఎలా ఉందని అడిగితే, బాగానే ఉందని చెప్పేవారు. నవంబరులో ఏకంగా 101 సార్లు ఫోన్లు చేశారు. అప్పటికీ ఆ నంబర్లను బ్లాక్‌లో పెట్టినా, 39 వేర్వేరు నంబర్ల నుంచి చేశారు. ఇంట్లో ఉన్న కుటుంబ సభ్యుల చరవాణికి కాల్స్‌ వచ్చాయి. పలుమార్లు హెచ్చరించినప్పటికీ వారిలో మార్పు రాలేదు. పైగా బాధితులనే బెదిరించారు. దీంతో దిలీప్‌ పోలీసులను ఆశ్రయించారు. వారు కంపెనీ సిబ్బందిని పిలిపించి మందలించారు. మరోసారి ఫోన్‌ వస్తే కేసు నమోదు చేస్తామని  హెచ్చరించి పంపారు.