చెలమనీటికీ చెమట చిందించాల్సిందే..!

న్యూస్‌టుడే, ఒంటిమిట్ట: పెన్నా నదీతీరంలోని ఒంటిమిట్ట మండలం దర్జిపల్లిలో తాగునీటి సమస్య ప్రజలను తీవ్రంగా వేధిస్తోంది. గ్రామంలో పంచాయతీ బోరునీరు వంట, తాగడానికి అనువుగా లేదు. గ్రామంలో 75 కుటుంబాల్లో 280 మంది నివాసం ఉంటున్నారు. కొందమంది ప్రైవేటుగా తాగునీటిని కొనుగోలు చేసుకుంటుండడగా, చాలామంది బిందెలు పట్టుకుని గ్రామసమీపంలోని పెన్నమ్మ చెంతకు వెళుతున్నారు. అక్కడ చెలమల్లో ఊటనీరు తోడుకుంటున్నారు. గతంలో ఒకటి, రెండు అడుగుల్లోనే ఊట నీరు లభించేదని, వైకాపా పాలనలో ఇసుకాసురులు యంత్రాలతో ఇష్టారాజ్యంగా తవ్వేయడంతో 15 అడుగుల లోతులోకి జలసిరి జారి పోయిందని గ్రామస్థులు వాపోతున్నారు. ప్రస్తుతం ఎండల్లో నది మధ్యకు వెళ్లి నీరు తెచ్చుకోవడానికి తీవ్ర ఇబ్బందులు పడుతున్నామని గ్రామస్థులు ఆవేదన వ్యక్తం చేస్తున్నారు.