తెదేపాకు అనుకూలంగా వ్యవహరిస్తే చంపేస్తామని బెదిరింపు

ఇంటికొచ్చి దాడి చేశారని  పోలీసులకు ఫిర్యాదు చేసిన పార్టీ నేత

పోలీసులకు ఫిర్యాదు చేస్తున్న సిద్దవరం వెంకటేశ్వరరెడ్డి, నాయకులు

పెనగలూరు, న్యూస్‌టుడే: తెదేపాకు అనుకూలంగా వ్యవహరిస్తే చంపేస్తామని గుర్తు తెలియని వ్యక్తులు తన ఇంటికి వచ్చి బెదించారని ఆ పార్టీ నాయకుడు సిద్దవరం వెంకటేశ్వర రెడ్డి పెనగలూరు పోలీసులకు సోమవారం ఫిర్యాదు చేశారు. ఆయన తెలిపిన వివరాల మేరకు.. ఆదివారం రాత్రి 11.30 గంటల సమయంలో సిద్దవరంలోని తన ఇంటి తలుపు చప్పుడు కావడంతో వెళ్లి తలుపు తీయగా గుర్తు తెలియని ఆరు మంది దౌర్జన్యంగా ఇంట్లోకి ప్రవేశించినట్లు చెప్పారు. తన చరవాణిని లాక్కుని అసభ్యంగా తిట్టి కొట్టారన్నారు. వైకాపాకు వ్యతిరేకంగా తిరుగుతున్నావా నీ అంతు చూస్తామంటూ దుండగులు బెదిరించినట్లు చెప్పారు. మే 14వ తేదీ వరకు గ్రామం నుంచి వదిలి వెళ్లాలని లేకుంటే అంతం చేస్తామంటూ హెచ్చరించినట్లు వివరించారు. విచారించి బాధ్యులపై చర్యలు తీసుకోవాలని పోలీసులను కోరారు. కేసు నమోదు చేసి దర్యాప్తు చేస్తున్నట్లు పెనగలూరు ఎస్సై సుభాష్‌చంద్రబోస్‌ తెలిపారు.