షర్మిలకు ఓటేయాలని పిలుపు

మాట్లాడుతున్న మాజీ మంత్రి వివేకా కుమార్తె సునీతారెడ్డి, పక్కన కాంగ్రెస్‌ అభ్యర్థి బ్రహ్మానందరెడ్డి

కొండాపురం, న్యూస్‌టుడే: అజాతశత్రువుగా అందరి మన్ననలు పొందిన మాజీ మంత్రి వైఎస్‌ వివేకానందరెడ్డిని అత్యంత కిరాతకంగా నరికి చంపిన వారికి శిక్ష పడే వరకు పోరాడుతూనే ఉంటానని ఆయన కుమార్తె డాక్టరు సునీత పేర్కొన్నారు. శనివారం మండల పరిధిలోని కె.సుగుమంచిపల్లె నుంచి కొండాపురం వరకు రోడ్‌ షోలో సునీత పాల్గొన్నారు. ఈ సందర్భంగా ఆమె మాట్లాడుతూ అయిదేళ్లగా న్యాయం కోసం పోరాటం చేస్తున్నానని ఆవేదన వ్యక్తం చేశారు. న్యాయం కోసం తాను చేస్తున్న పోరాటానికి షర్మిల మద్దతుగా నిలిచారన్నారు. కాంగ్రెస్‌ తరపున కడప ఎంపీగా పోటీ చేస్తున్న షర్మిల, జమ్మలమడుగు అభ్యర్థిగా బరిలో నిలిచిన బ్రహ్మానందరెడ్డిని గెలిపించాలని కోరారు. హస్తం గుర్తుకు ఓటేయాలని ప్రజలను అభ్యర్థించారు. రాష్ట్రమంతటా వైఎస్‌ఆర్‌, వివేకాలను ప్రజలు అభిమానిస్తారన్నారు. తన తండ్రిని గొడ్డలితో నరికి చంపారని..వైఎస్‌ఆర్‌ బతికి ఉంటే సహించేవారు కాదన్నారు. రాజశేఖర్‌రెడ్డిని దురదృష్టవశాతు దేవుడు తీసుకువెళ్తే వివేకానందరెడ్డి మనకోసం పని చేస్తుండగా అతి దారుణంగా కిరాతనంగా హత్య చేసి మన దగ్గర లేకుండా చేశారని కంటతడి పెట్టారు. పలువురు గండికోట ముంపువాసులు పరిహారం రాలేదని తెలుపగా..సొంత చినాన్నకే న్యాయం జరగకుంటే మీకు ఎట్లా న్యాయం చేస్తారని వైఎస్‌ జగన్‌ను ఉద్దేశించి విమర్శించారు. ఈ కార్యక్రమంలో సీపీఐ మండల కార్యదర్శి మనోహర్‌బాబు, ఏఐటీయూసీ మండల ప్రధాన కార్యదర్శి వెంకటరమణ, పెద్ద సంఖ్యలో ప్రజలు పాల్గొన్నారు.