‘అమరావతిపై తాడోపేడో తేల్చాలని కోరతాం’

రాజధాని అంశం కేంద్రం పరిధిలో లేదనడం సరికాదు: జీవీఆర్‌ శాస్త్రి

దిల్లీ: ఏపీ రాజధాని అంశం కేంద్రం పరిధిలో లేదనడం సరికాదని అమరావతి ఐకాస ఛైర్మన్‌ జీవీఆర్‌ శాస్త్రి అన్నారు. రాజధాని అంశాన్ని విభజన చట్టంలో చేర్చిన విషయాన్ని ఆయన గుర్తు చేశారు. అమరావతి రైతుల ఆందోళన 250 రోజులకు చేరిన సందర్భంగా దిల్లీలో శాస్త్రి మీడియాతో మాట్లాడారు. త్యాగాలు చేసిన రాజధాని ప్రాంత రైతులకు మనోవేదన మిగుల్చుతున్నారని ఆవేదన వ్యక్తం చేశారు. 

వర్షాకాల సమావేశాల్లో ప్రధాని, కేంద్ర హోంమంత్రిని కలిసి ఈ అంశాన్ని వివరిస్తామని శాస్త్రి చెప్పారు. ఎంపీలందరికీ ఈ విషయాన్ని తెలియజేసి ఈ సమావేశాల్లో తాడోపేడో తేల్చాలని కోరతామన్నారు. రైతులు స్వచ్ఛందంగా భూములు ఇచ్చినందునే గతంలో అమరావతిపై కోర్టుల్లో ఒక్క కేసు కూడా లేదన్నారు. రాష్ట్రంలో అభివృద్ధి వికేంద్రీకరణ అవసరం లేదని.. అన్ని జిల్లాలకు అభివృద్ధి చెందే స్థాయిలో సహజ వనరులు పుష్కలంగా ఉన్నాయని శాస్త్రి చెప్పారు.