చిన్నారి ‘సెల్యూట్‌’కు సలాం కొట్టాల్సిందే

దిల్లీ: భారత సరిహద్దుల్లో విధులు నిర్వర్తించే సైన్యం అంటే దేశ ప్రజలందరికీ ఎనలేని గౌరవం. ఇక, సరిహద్దు ప్రాంత వాసులకు వారెప్పుడు సుపరిచితులే. అయితే, ఇండో టిబెటన్‌ సరిహద్దు పోలీసులు(ఐటీబీపీ) కనిపించగానే ఓ చిన్నారి హుషారుతో సెల్యూట్ చేసిన తీరు ఇప్పుడు నెట్టింట్లో వైరల్ గా మారింది. ఐటీబీపీ ట్విటర్‌లో షేర్ చేసిన వీడియోలో తనకు దగ్గరగా పెట్రోలింగ్ సిబ్బంది వస్తుంటే ఆ బాలుడు వారికి సెల్యూట్ చేస్తూ కనిపించాడు.

‘సెల్యూట్‌! నమ్‌గ్యాల్, లద్దాఖ్ దగ్గర్లోని చుషుల్‌కు చెందిన ఈ చిన్నారి ఐటీబీపీ దళాలు ఆ దారిలో వెళ్తుండగా సెల్యూట్ చేస్తూ కనిపించాడు. చాలా హుషారుగా  కనిపించిన ఆ బాలుడిని  ఐటీబీపీ అధికారి ఒకరు తన వీడియోలో బంధించారు’ అంటూ ఐటీబీపీ ట్వీట్ చేసింది. అలాగే సావధాన్‌, విశ్రమ్ అనే పదాలకు తగ్గట్టుగా ఆ బాలుడు తన పాదాలను కదపడం ఆ వీడియోలో కనిపిస్తుంది. ఈ దృశ్యాన్ని చూసిన రాజ్యసభ సభ్యుడు రాజీవ్ చంద్రశేఖర్ ఆ చిన్నారికి సహాయం చేయడానికి ముందుకు వచ్చారు. అతడి వివరాలు పంపించమని సదరు అధికారులను కోరారు.