Fat Transfer: కొవ్వుతో కొత్త అందాలు.. ఎలాగో తెలుసా..!

ఇంటర్నెట్‌ డెస్క్‌: కొవ్వును వ్యర్థ పదార్థంగానే భావిస్తాం.. కొన్ని వ్యాధులకు కారణమని నిందిస్తాం. అదే కొవ్వు ఇప్పుడు అందాల మెరుగులు దిద్దుకోవడానికి అక్కరకు వస్తోంది. ఎక్కడయితే అధికంగా కొవ్వు ఉంటుందో దాన్ని సేకరించి అవసరమైన చోట అమర్చడానికి సాంకేతిక పరిజ్ఞానం అందుబాటులోకి వచ్చింది. దీన్నే ఫ్యాట్‌ ఆటో ట్రాన్స్‌ఫర్‌గా పిలుస్తున్నారు. ఇది ఎలా చేస్తారో, ఎవరికి చేస్తారో ప్రముఖ ప్లాస్టిక్‌ సర్జన్‌ వై.వి.రావ్‌ వివరించారు. అవసరానికి మించి ఉన్నప్పుడే.. కొవ్వు అనగానే అందరూ భయపడుతారు. గుండె, కిడ్నీ, కాలేయంతో పాటు అధిక రక్తపోటు, మధుమేహం, హార్మోన్ల అసమతుల్యం వస్తుందని ఆందోళన చెందుతారు. కానీ కొవ్వు తప్పనిసరి అవసరం. అది లేకపోతే బతకలేం. అవసరానికి మించి ఉన్నప్పుడే జాగ్రత్త పడాలి.  ప్రయోజనాలు తెలుసుకోండి.. శరీరంలోని కొన్ని భాగాలైనా చెంపలు, రొమ్ములు, పిరుదులు, తొడలు లాంటి భాగాలు ఎబ్బెట్టుగా ఉంటే.. కొవ్వును బదిలీ చేసి సరి చేసే పద్ధతి అందుబాటులోకి వచ్చింది. ఒకటి నుంచి మూడు, నాలుగు సిట్టింగ్‌లలో అనుకున్నంత అందాన్ని పొందే అవకాశం ఉంది. చెంపలకు ఒక సిట్టింగ్‌ సరిపోవచ్చు. రొమ్ములకు రెండు, మూడు సిట్టింగ్‌లతో ఆకృతిని సమకూర్చడానికి వీలుంది. పుట్టకతో సమస్య ఉన్నవారికి, ప్రమాదాలకు గురైనవారికి ఈ ప్రయత్నం బాగా ఉపకరిస్తుంది. ఎలాంటి కోతలు లేకుండా ఇంజెక్షన్లతోనే చికిత్స చేస్తారు.  చికిత్స తర్వాత ఏం చేయాలంటే.. ఫ్యాట్‌ ట్రాన్స్‌ఫర్‌ తర్వాత ఆ ప్రాంతంలో ఐస్‌ప్యాక్‌ పెడితే సరిపోతుంది. ఎక్కువగా మసాజ్‌ చేయొద్దు. ముందుగా మొహం కాస్త ఉబ్బినట్టు ఉంటుంది. వారం పది రోజుల్లో ఇది సర్దుకుంటుంది. ఎలాంటి ఇబ్బందులుండవు. అనుకున్న అందం సొంతం అవుతుంది.