Heavy Bleeding: నెలసరిలో ఎక్కువగా రక్తం పోతుందా? ఇలా ఎందుకు జరుగుతుందంటే!

ఇంటర్నెట్‌ డెస్క్‌: మహిళలకు నెలనెలా సక్రమంగా సాగిపోవాల్సిన రుతుక్రమం కొంతమందికి చాలా ఇబ్బందులను తెచ్చిపెడుతుంది. నెలసరిలో రక్తం ఎక్కువగా పోవడంతో చాలా మంది రక్తహీనతతో సతమతమవుతుంటారు. కొత్త చిక్కులతో ఆందోళన చెందుతారు. అసలు అధిక రుతుస్రావం ఎందుకు అవుతుంది? దానికి గల కారణాలేంటో ఆయుర్వేద ఫిజిషియన్‌ డాక్టర్‌ గాయత్రిదేవి వివరించారు.

ఎందుకు వస్తుందంటే...!

నెలసరిలో రక్తం అధికంగా పోవడం మంచిది కాదు. ఎప్పుడో ఓసారి కాకుండా ప్రతి నెలా ఇలాగే ఉంటే మాత్రం కారణం తెలుసుకోవాల్సిందే. నెలసరిలో 20-60 ఎంఎల్‌ దాకా రక్తస్రావం కావాలి. కానీ కొంతమందిలో అంతకంటే ఎక్కువగా కనిపిస్తుంది. ఐదు రోజులయినా కొంతమందికి ఎక్కువగా రక్తస్రావం కనిపించడంతో ఏ పని సరిగా చేసుకోలేరు. ఇక ఉద్యోగులకైతే మరీ కష్టంగా ఉంటుంది. ఎక్కువగా హార్మోన్లలో తేడాలు, ఫైబ్రాయిడ్స్‌ ఉండటంతో కూడా ఈ సమస్య కనిపిస్తుంది. 

ఏం చేయాలంటే...!

పిరియడ్స్‌ సమయంలో కారం, మసాలాలు తగ్గించుకోవాలి. తీపి ఆహార పదార్థాలు, చేదుగా ఉండే కాకర లాంటి కూరగాయలు తీసుకోవాలి. యోగాసనాలు చేయడం కూడా మంచి ఫలితాలు ఇస్తాయి. ప్రాణాయామం కూడా చేయాలి. మహిళలు కాస్త ఎక్కువ విశ్రాంతి తీసుకోవాలి. నెయ్యి, కందిపప్పు, పాత బియ్యం, నిమ్మ, దానిమ్మ, ఉసిరి, పాలపదార్థాలు, ఖర్జూరం లాంటి వాటిని ఎక్కువగా తీసుకోవడంతో స్రావం ఎక్కువ కాకుండా నివారిస్తాయి. నెలసరి సమయంలో ప్రతి రోజు చెంచా పసుపులో ఒక చుక్క నీటిని వేసి ఉండచేసి మింగాలి. ధనియాల కషాయం మూడు పూటలా తాగితే ఫలితం ఉంటుంది.