మంత్రి తలసానికి రూ. 5 వేల జరిమానా

ఖైరతాబాద్‌: అనుమతి లేని ప్రాంతంలో కటౌట్‌ ఏర్పాటు చేసినందుకు గాను మంత్రి తలసాని శ్రీనివాస్‌యాదవ్‌కు హైదరాబాద్‌ నగరపాలక సంస్థ (జీహెచ్‌ఎంసీ) శనివారం జరిమానా విధించింది. నెక్లెస్‌ రోడ్డులోని జలవిహార్‌లో ఈ నెల 17న నిర్వహిస్తున్న ముఖ్యమంత్రి జన్మదినోత్సవాలను పురస్కరించుకుని మంత్రి తలసాని శ్రీనివాస్‌యాదవ్‌ తన ఫొటోతో పాటు సీఎం కేసీఆర్‌, మంత్రి కేటీఆర్‌ల చిత్రాలతో భారీ కటౌట్‌ను నెక్లెస్‌ రోటరీ వద్ద ఏర్పాటు చేశారు. కటౌట్లకు అనుమతి లేనిచోట నిబంధనల్ని అతిక్రమించారంటూ జీహెచ్‌ఎంసీకి ఆన్‌లైన్‌ ద్వారా ఓ వ్యక్తి ఫిర్యాదు పంపారు. దీంతో మంత్రి తలసానికి అధికారులు రూ.5 వేల జరిమానాతో కూడిన చలాన్‌ వేశారు. ఆ జరిమానాను చెల్లించినట్లు మంత్రి సన్నిహితవర్గాలు పేర్కొన్నాయి. మరోవైపు శనివారం రాత్రి సంబంధిత కటౌట్‌ను జీహెచ్‌ఎంసీ సిబ్బంది అక్కడి నుంచి తొలగించారు.