పంజాబ్‌లో ప్రజారవాణా బంద్‌

చండీగఢ్‌: కరోనా వైరస్‌ వ్యాప్తిని నివారించేందుకు పంజాబ్‌ ప్రభుత్వం కఠిన నిర్ణయాలు తీసుకుంటోంది. ఈ క్రమంలో ప్రజారవాణాను తాత్కాలికంగా నిలిపివేయనున్నట్లు ప్రభుత్వం ప్రకటించింది. మార్చి 20 అర్ధరాత్రి నుంచి ఈ నిలిపివేత అమలులోకి వస్తుందని పేర్కొంది. కరోనా నేపథ్యంలో ప్రజారవాణాను నిలిపివేయనున్న తొలి రాష్ట్రం పంజాబ్‌ కావడం విశేషం. శుక్రవారం నుంచి బస్సులు, ఆటోలతో పాటు ఏ ఇతర ప్యాసింజర్‌ వాహనాలు రోడ్లపై తిరిగేందుకు వీల్లేదని ప్రభుత్వం స్పష్టం చేసింది. ఈ మేరకు గురువారం మంత్రివర్గం సమావేశమైంది. ఈక్రమంలో ప్రజారవాణాను నిలిపివేసేందుకు కేబినేట్‌ ఆమోదం తెలిపింది. దీంతో పాటు ప్రభుత్వం పలు కీలక ఆదేశాలు జారీ చేసింది. శుభకార్యాలైతే 50 మంది, ఇతర సమావేశాలైతే 20 మంది కంటే ఎక్కువ గుంపులుగా ఉండరాదని చెప్పింది. ఇదిలా ఉండగా.. భారత రైల్వే సైతం విడతల వారీగా రైళ్ల రద్దుకు పూనుకుంది.