Andhra News: గుడివాడ క్యాసినో వ్యవహారం.. తెదేపా ఫిర్యాదుపై స్పందించిన ఐటీ శాఖ

అమరావతి: కృష్ణా జిల్లా గుడివాడ క్యాసినో వ్యవహారంపై ఐటీ శాఖ దృష్టి సారించింది. క్యాసినో వ్యవహారంలో తమ వద్దనున్న సమాచారం అందించాల్సిందిగా తెదేపా పొలిట్‌బ్యూరో సభ్యుడు వర్ల రామయ్యకు ఐటీ నోటీసులు జారీ చేసింది. వైకాపా నేతలు కొడాలి నాని, వల్లభనేని వంశీల నేతృత్వంలో గుడివాడలో క్యాసినో నిర్వహించారని గతంలో తెదేపా ఆరోపణలు చేసింది. క్యాసినో అంశమై కొడాలి నాని, వంశీలపై సీబీడీటీ, ఈడీ, డీఆర్ఐ, కేంద్ర ఆర్థిక, హోం మంత్రిత్వ శాఖలకు ఇప్పటికే ఫిర్యాదు చేసింది. తెదేపా చేసిన ఫిర్యాదుపై స్పందించిన ఐటీ శాఖ.. సమాచారం సేకరణలో భాగంగా వర్ల రామయ్యను ఈ నెల 19న ఐటీ అధికారుల ఎదుట హాజరుకావాలని నోటీసులు జారీ చేసింది.