Corona: కరోనా బూస్టర్‌ డోసు తీసుకోవడంలో తెలంగాణ నంబర్‌ వన్‌: హరీశ్‌రావు

హైదరాబాద్‌: కరోనా బూస్టర్ డోసు తీసుకోవడంలో తెలంగాణ దేశంలోనే ప్రథమ స్థానంలో నిలవడం సంతోషమని రాష్ట్ర వైద్యారోగ్య శాఖ మంత్రి హరీశ్‌ రావు అన్నారు. దీని వెనక సీఎం కేసీఆర్ ముందు చూపుతో తీసుకున్న చర్యలు, అవగాహన కార్యక్రమాలు, వైద్య సిబ్బంది శ్రమ ఉన్నాయని తెలిపారు. కరోనా నుంచి మనల్ని మనం కాపాడుకోవడంలో బూస్టర్ డోసు ఎంతో ఉపయోగపడుతుందన్నారు. ఈ మేరకు ఆయన ట్వీట్‌ చేశారు. చైనా సహా పలు దేశాల్లో కొత్త వేరియంట్ వ్యాప్తి చెందుతున్న నేపథ్యంలో అర్హులైన ప్రతి ఒక్కరూ బూస్టర్ డోసు తీసుకోవడం అవసరమని హరీష్ రావు పేర్కొన్నారు. రాష్ట్రాలకు బూస్టర్ డోసు పంపిణీ చేయాలని ఇప్పటికే కేంద్రాన్ని కోరామని తెలిపారు. త్వరలో అవసరమైనన్ని డోసులు కేంద్రం పంపిణీ చేస్తుందని ఆశిస్తున్నట్లు హరీశ్‌రావు పేర్కొన్నారు.