Ukraine crisis: విదేశాంగ మంత్రి జైశంకర్‌కు చంద్రబాబు ఫోన్‌

అమరావతి: విదేశీ వ్యవహారాల మంత్రి జైశంకర్‌తో తెలుగుదేశం పార్టీ అధినేత చంద్రబాబు ఫోన్‌లో మాట్లాడారు. రష్యా-ఉక్రెయిన్‌ యుద్ధం నేపథ్యంలో ఉక్రెయిన్‌లో చిక్కుకుపోయిన 4 వేల మందికి పైగా తెలుగు విద్యార్థులను స్వదేశానికి తరలించాలని కేంద్ర మంత్రిని చంద్రబాబు కోరారు. యుద్ధం కారణంగా అక్కడి తెలుగు విద్యార్థులు తీవ్ర ఇబ్బందులు పడుతున్నారని కేంద్ర మంత్రికి వివరించారు. ఉక్రెయిన్‌లో చిక్కుకు పోయిన విద్యార్థులతో ఈ రోజు జూమ్ ద్వారా మాట్లాడిన విషయాన్ని.. వారి కష్టాలను జైశంకర్ దృష్టికి తీసుకెళ్లారు. తెలుగు విద్యార్థులను తరలించే బాధ్యత తాను తీసుకుంటానని కేంద్ర మంత్రి హామీ ఇచ్చినట్లు చెప్పారు. బాధిత విద్యార్థుల వివరాలను తన కార్యాలయంతో పంచుకోవాలని సూచించినట్లు పేర్కొన్నారు.