TS News: ‘పాలమూరు- రంగారెడ్డి’ మొదటి మోటార్‌ డ్రై రన్‌ విజయవంతం

మహబూబ్‌నగర్‌: ఉత్తర తెలంగాణకు కాళేశ్వరం మాదిరిగా.. ఉమ్మడి మహబూబ్‌నగర్‌ జిల్లాకు పాలమూరు - రంగారెడ్డి ఎత్తిపోతల పథకం వరదాయిని అని రాష్ట్ర నీటిపారుదల శాఖ ప్రత్యేక ప్రధాన కార్యదర్శి రజత్ కుమార్ అన్నారు. ఈ పథకంలో భాగమైన కర్వెన జలాశయానికి 45 రోజుల్లో సాగునీటిని తీసుకొస్తామని వెల్లడించారు. తిమ్మాజీపేట సమీపంలోని పాలమూరు - రంగారెడ్డి ఎత్తిపోతల పథకం కాలువ పనులను అధికారులతో కలిసి ఆయన పరిశీలించారు. ప్రాజెక్టులో మొదటి మోటార్‌ డ్రై రన్‌ ప్రారంభించారు. అనంతరం ప్రాజెక్ట్‌ పనులపై నీటిపారుదల శాఖ, రెవెన్యూ అధికారులతో సమీక్షించారు. ఈ సందర్భంగా రజత్‌ కుమార్‌ మాట్లాడారు.

ప్రాజెక్టులో 4 మోటార్‌లను అమర్చామని, అందులో నార్లపూర్‌ రిజర్వాయర్‌లో నిర్వహించిన మొదటి మోటార్‌ డ్రై రన్‌ను విజయవంతంగా పరీక్షించినట్లు తెలిపారు. మరో 15 రోజుల్లో ఒక పంపు ద్వారా నీళ్లను ఎత్తిపోసే ప్రక్రియ ప్రారంభిస్తామన్నారు. ఒక మోటార్ 3 వేల క్యూసెక్కుల నీటిని ఎత్తిపోస్తుందని.. నిబంధనల ప్రకారం ముందుగా నార్లాపూర్ రిజర్వాయర్‌ను నింపుతామని తెలిపారు. ఆ తర్వాత 45 రోజుల్లో ఎదుల, వట్టెం, కర్వెన రిజర్వాయర్‌ల వరకు ఆ నీళ్లు తీసుకొస్తామన్నారు. పర్యావరణ అనుమతులతో పాటు అన్ని అనుమతులు వచ్చాక.. గత 3 వారాలుగా ఇంజినీర్లు, సిబ్బంది 24 గంటలు పనిచేస్తున్నారని వివరించారు. చిన్నచిన్న సమస్యలు, పనులు మిగిలి ఉన్నాయని.. మిషన్ భగీరథకు సంబంధించి వట్టెం వద్ద పైపు మార్చే పనులతో పాటు కుడికిళ్ల వద్ద డీప్ కట్ సమస్యను సైతం పరిష్కరిస్తామన్నారు.